8. อภยตฺเถรคาถา
[98]
‘‘รูปํ ทิสฺวา สติ มุฏฺฐา, ปิยํ นิมิตฺตํ มนสิกโรโต;
สารตฺตจิตฺโต เวเทติ, ตญฺจ อชฺโฌส ติฏฺฐติ;
ตสฺส วฑฺฒนฺติ อาสวา, ภวมูโลปคามิโน’’ติ [ภวมูลา ภวคามิโนติ (สี. ก.)]ฯ
… อภโย เถโร…ฯ
9. อุตฺติยตฺเถรคาถา
[99]
‘‘สทฺทํ สุตฺวา สติ มุฏฺฐา, ปิยํ นิมิตฺตํ มนสิกโรโต;
สารตฺตจิตฺโต เวเทติ, ตญฺจ อชฺโฌส ติฏฺฐติ;
ตสฺส วฑฺฒนฺติ อาสวา, สํสารํ อุปคามิโน’’ติฯ
… อุตฺติโย เถโร…ฯ
10. (ทุติย)-เทวสภตฺเถรคาถา
[100]
‘‘สมฺมปฺปธานสมฺปนฺโน, สติปฏฺฐานโคจโร;
วิมุตฺติกุสุมสญฺฉนฺโน, ปรินิพฺพิสฺสตฺยนาสโว’’ติฯ
… เทวสโภ เถโร…ฯ
วคฺโค ทสโม นิฏฺฐิโตฯ
ตสฺสุทฺทานํ –
ปริปุณฺณโก จ วิชโย, เอรโก เมตฺตชี มุนิ;
จกฺขุปาโล ขณฺฑสุมโน, ติสฺโส จ อภโย ตถา;
อุตฺติโย จ มหาปญฺโญ, เถโร เทวสโภปิ จาติฯ
11. เอกาทสมวคฺโค
1. เพลฏฺฐานิกตฺเถรคาถา
[101]
‘‘หิตฺวา คิหิตฺตํ อนโวสิตตฺโต, มุขนงฺคลี โอทริโก กุสีโต;
มหาวราโหว นิวาปปุฏฺโฐ, ปุนปฺปุนํ คพฺภมุเปติ มนฺโท’’ติฯ
… เพลฏฺฐานิโก เถโร…ฯ
2. เสตุจฺฉตฺเถรคาถา
[102]
‘‘มาเนน วญฺจิตาเส, สงฺขาเรสุ สํกิลิสฺสมานาเส;
ลาภาลาเภน มถิตา, สมาธิํ นาธิคจฺฉนฺตี’’ติฯ
… เสตุจฺโฉ เถโร…ฯ
3. พนฺธุรตฺเถรคาถา
[103]
‘‘นาหํ เอเตน อตฺถิโก, สุขิโต ธมฺมรเสน ตปฺปิโต;
ปิตฺวา [ปีตฺวาน (สี. สฺยา.)] รสคฺคมุตฺตมํ, น จ กาหามิ วิเสน สนฺถว’’นฺติฯ
… พนฺธุโร [พนฺธโน (ก.)] เถโร…ฯ
4. ขิตกตฺเถรคาถา
[104]
‘‘ลหุโก วต เม กาโย, ผุฏฺโฐ จ ปีติสุเขน วิปุเลน;
ตูลมิว เอริตํ มาลุเตน, ปิลวตีว เม กาโย’’ติฯ
… ขิตโก เถโร…ฯ
5. มลิตวมฺภตฺเถรคาถา
[105]
‘‘อุกฺกณฺฐิโตปิ น วเส, รมมาโนปิ ปกฺกเม;
น ตฺเววานตฺถสํหิตํ, วเส วาสํ วิจกฺขโณ’’ติฯ
… มลิตวมฺโภ เถโร…ฯ
6. สุเหมนฺตตฺเถรคาถา
[106]
‘‘สตลิงฺคสฺส อตฺถสฺส, สตลกฺขณธาริโน;
เอกงฺคทสฺสี ทุมฺเมโธ, สตทสฺสี จ ปณฺฑิโต’’ติฯ
… สุเหมนฺโต เถโร…ฯ